вторник, 6 декабря 2011 г.

АКАФИСТ св. блгв. великому кн. АЛЕКСАНДРУ НЕВСКОМУ

АКАФИСТ св. блгв. великому кн. АЛЕКСАНДРУ НЕВСКОМУ 

Monday, 12 September 2011


Кондак 1
     Избранному воеводе земли Российския, светлому украшению Церкве Православныя, святому благоверному великому князю Александру Невскому похвальная восписующе, яко верою враги видимыя же и невидимыя победившему и в вере своей, по речению апостолову, добродетель, в добродетели же разум, в разуме же воздержание, в воздержании же терпение, в терпении же благочестие, братолюбие и любовь явившему, со умилением и радостию возопиим:
     Радуйся, святый благоверный великий княже Александре.

Икос 1
     Со Ангелы и всеми святыми предстоиши ныне Христу, блаженне Александре, моляся о любовию чтущих тя: темже поминающе, яко измлада Христа возлюбив, к небесным духом прилепился еси, безплотных подражав житию, ублажаем тя, вопиюще:
     Радуйся, корене благочестиваго отрасле пречестная;
     Pадуйся, благоверия предков наследниче.
     Радуйся, добродетелей отца боголюбиваго подражателю;
     Pадуйся, кротости и благочестия матерняго преемниче.
     Радуйся, вождю к Небесем стада своего христолюбиваго;
     Pадуйся, в житии всех рабов Божиих друже и ревнителей благочестия собеседниче.
     Радуйся, преподобных лика богосветлаго сопричастниче;
     Pадуйся, веры Христовы непобедимый исповедниче.
     Радуйся, волею мучениче, сликовствуяй ныне сонму мучеников добропобедному;
     Pадуйся, христианскаго упования и любве всем нам девственный проповедниче.
     Радуйся, уставов и чина церковнаго благолепнаго ревнителю;
     Pадуйся, верных чад Церкве и угодников Божиих сонаследниче.
     Радуйся, святый благоверный великий княже Александре.

Кондак 2
     Видевше лепоту лица и телеснаго возраста твоего, новоградстии людие радовахуся и славляху Бога, взирающе на тя: мы же, поминающе светлейшия паче солнца добродетели твоя, блаженне Александре, прославившему тя Господеви поим: Аллилуия.

Икос 2
     Разумел еси, богомудре Александре, яко преходят образ мира сего, едино же есть на потребу человеком еже благоугодити Господеви; сего ради измлада от любве к миру и яже в мире уклонился еси, вожделев же зде сущими стяжати небесная, яко верный раб Господу во всем житии неленостно послужил еси. Темже вопием ти:
     Радуйся, подвижниче веры, угождение Богу паче всего предызбравый;
     Pадуйся, подобне Аврааму во всем житии непорочно пред Богом поживый.
     Радуйся, Исааково послушание показавый;
     Pадуйся, путем Иаковля смиренномудрия ходивый.
     Радуйся, Иосифову чистоту и целомудрие стяжавый;
     Pадуйся, Моисеову любовь к людем своим в себе явивый.
     Радуйся, якоже Самуил чиста себе от всякаго любостяжания соблюдавый;
     Pадуйся, кротостию Давидовою враги своя победивый.
     Радуйся, Петровой пламенней вере поревновавый;
     Pадуйся, с Павлом игу Христову себе поработивый.
     Радуйся, богомудрие Иоанново подвигом поучения в слове Божием снискавый;
     Pадуйся, многих святых добродетели в себе совокупивый.
     Радуйся, святый благоверный великий княже Александре.

Кондак 3
     Силою веры стяжал еси, блаженне Александре, высшее любомудрие, егоже ради, презирая плоть, прилежал еси о души безсмертней; темже ублажающе тя, яко стяжавша ныне безсмертие, вопием прославившему тя Христу: Аллилуия.

Икос 3
     Имеяй всегда пред очима своима Господа, трезвенно пожил еси, блаженне Александре, и вся яже творил еси, творя во славу Божию, угодил еси Богу, Емуже предстоиши ныне с лики от века угодивших; темже радующеся о тебе, зовем ти:
     Радуйся, истиннаго трезвения подвижниче;
     Pадуйся, спасительнаго созерцания любителю.
     Радуйся, наставниче наш в подвиге от мира удаления;
     Pадуйся, стяжателю совершеннаго дара бодрственнаго себе внимания.
     Радуйся, всякаго безсловеснаго вожделения твердый противоборниче;
     Pадуйся, благочестия добрый подвижниче, преуспевый в разуме и деянии.
     Радуйся, яко силою молитвы препобедил еси диавольская искушения;
     Pадуйся, яко себе от греха оградил еси последних воспоминанием.
     Радуйся, яко возлюбил еси душею еже о небесных помышление;
     Pадуйся, яко преуспел еси в неленостных яже к Богу молитвенных предстояниих.
     Радуйся, яко все житие свое освящал еси непрестанным имене Божия призыванием;
     Pадуйся, яко угождал еси Господеви всяким благоугождением.
     Радуйся, святый благоверный великий княже Александре.

Кондак 4
     Бури искушений воздвигоша врази и противу тебе, блаженне Александре. Ты же препобедил еси сия силою благодати Христовы; темже ныне, к тихому пристанищу притек, с лики искушенных в мире, победивших же мир, вопиеши Христу: Аллилуия.

Икос 4
     Слышав Павла, глаголюща: всяк подвизаяйся от всех воздержится, вся в уметы вменил еси, блаженне Александре, да Христа приобрящеши, подвигами же отвержения себе и ко благим делом принуждения стяжал еси свободу славы чад Божиих; темже ублажающе тя, вопием ти таковая:
     Радуйся, образ отвержения себе нам показавый;
     Pадуйся, ношению креста в последовании Христу нас научивый.
     Радуйся, плоть со страстьми и похотьми ея поправый;
     Pадуйся, житием твоим суету мира обличивый.
     Радуйся, всякое пристрастие земное от себе отгнавый;
     Pадуйся, разум свой в послушание веры пленивый.
     Радуйся, волею своею благое иго заповедей Христовых подъявый;
     Pадуйся, сердце свое от всякия страсти душевредныя чисто сохранивый.
     Радуйся, себе Богу всесовершенне предавый;
     Pадуйся, чрез все житие свое Богу послуживый.
     Радуйся, совершением заповедей любовь к себе Божию стяжавый;
     Pадуйся, наследие Царствия благоугождением Богу улучивый.
     Радуйся, святый благоверный великий княже Александре.

Кондак 5
     Боготечною звездою прешел еси в мире, блаженне Александре, блистающ славою и добродетелию; темже ныне сияеши на Небесех славою вечною с лики праведник, с нимиже выну воспеваеши Христу: Аллилуия.

Икос 5
     Видевше тя, блаженне Александре, николиже во бранех побеждаема, всегда же побеждающа, невернии единаго имене твоего устрашахуся, мы же, поминающе исполненное веры мужество твое, ублажаем тя, глаголюще:
     Радуйся, доблественный в защиту веры и Церкве воителю;
     Pадуйся, своея земли мужественный защитителю.
     Радуйся, наветов вражиих мудрый разорителю;
     Pадуйся, мира безпомощных сильный оградителю.
     Радуйся, воинства свейскаго на брегах невских славный победителю;
     Pадуйся, безопасности всея северныя страны земли Российския охранителю.
     Радуйся, злых козней иноверия, подвигших чуждую рать на землю нашу, разрушителю;
     Pадуйся, законов правды богоукрепляемый утвердителю.
     Радуйся, Пскова, отечества святыя Ольги, свободителю;
     Pадуйся, ненавидевших мира умирителю.
     Радуйся, буйства неустроенныя в тыя дни Литвы укротителю;
     Pадуйся, во всех сих бранех христолюбиваго воинства своего мудрый предводителю.
     Радуйся, святый благоверный великий княже Александре.

Кондак 6
     Проповедника кротости и терпения явил еси себе, блаженне Александре, посреди преславных побед твоих; темже и стяжал еси сугубый венец от Царя Христа, Емуже предстоиши ныне, вопия: Аллилуия.

Икос 6
     Провозсиял еси, блаженне Александре, паче мужества, терпением твоим, егоже стяжал еси, взирая на начальника веры и совершителя Иисуса, Иже вместо предлежащия ему радосте претерпе Крест; темже восхваляюще тя, усердно вопием:
     Радуйся, до конца в подвизех служения Богу претерпевый;
     Pадуйся, терпению Христову верно подражавый.
     Радуйся, силу заповеди Христовы, яже о любви ко врагом, премудре уразумевый;
     Pадуйся, и согрешшим противу тебе избавленным тобою людем любовь истинную показавый.
     Радуйся, во искушении от народа своего хитрость лукаваго прозревый;
     Pадуйся, мирным отбытием своим из земли своея злобу врага поправый.
     Радуйся, и во всем житии своем ухищрения сатаны проразумевый;
     Pадуйся, злое благим, по апостолу, выну препобеждавый.
     Радуйся, паки, в годину скорби, в помощь оскорбившему тя Новуграду предуспевый;
     Pадуйся, сего ради пламенную любовь от народа своего себе снискавый.
     Радуйся, Божия посещения, болезни и лишения, со упованием терпевый;
     Pадуйся, сего ради светлый венец от Господа стяжавый.
     Радуйся, святый благоверный великий княже Александре.

Кондак 7
     Хотяй провозсияти тебе всеми добродетельми, блаженне Александре, Владыка Христос призвал есть тебе к служению людем своим во дни посещения; ты же притяжал еси к терпению смирение, егоже ради ныне превознесен еси, предстоя Богу с песнию: Аллилуия.

Икос 7
     Дивно бе видети, како непобедимый воитель смиренно преклоняет главу свою пред неверными, ихже посла Господь на люди своя ради грех их: дивно же есть и воспомянути непобедимое смирение твое, блаженне Александре, имже и Господеви благоугодил еси, и люди своя спасл еси. Темже благодарно вопием ти:
     Радуйся, смирения Господня подражателю;
     Pадуйся, подобающаго богопоставленным властем почитания учителю.
     Радуйся, всякаго превозношения противоборче;
     Pадуйся, истиннаго послушания подвижниче.
     Радуйся, всем нам образе вернаго Богу служения;
     Pадуйся, начальствующим наставниче в богоприятном людем предстоянии.
     Радуйся, подвластных руководителю в богозаповеданном предержащим властем повиновении;
     Pадуйся, яко многажды ради блага людей своих путьшествовал еси к безбожным, ни во чтоже вменяя яже от них испытания.
     Радуйся, яко не устрашился еси, призвав Бога, приити к Батыеви, исполняя его веление;
     Pадуйся, яко многащи воспринимал еси на себе страшный ответ о неразумных народа своего востаниих.
     Радуйся, яко оградил еси люди твоя от зловреднаго с неверными общения;
     Pадуйся, яко мудре оградил еси в земли своей отеческия доблести и предания.
     Радуйся, святый благоверный великий княже Александре.

Кондак 8
     Странническое житие прешел еси на земли, блаженне Александре, не ведый покоя в трудех своих и не имый зде пребывающаго града, но грядущаго взыскуяй; сего ради ныне, блаженне, вселился еси в вечных обителех, выну поя Богу: Аллилуия.

Икос 8
     Всею душею послужив Господу и всем житием своим благоугодив Ему, прославился еси благочестием, егоже ради и исповедник явился еси веры Христовы, блаженне Александре; поминающе убо подвиг исповедничества твоего, вопием ти:
     Радуйся, злобы неверных не устрашивыйся;
     Pадуйся, твари паче Создавшаго не послуживый.
     Радуйся, солнцу и огню в стане безбожных не поклонивыйся;
     Pадуйся, веру свою во искушении сохранивый.
     Радуйся, велению безбожному не покоривыйся;
     Pадуйся, твердый проповедник веры пред неверными себе явивый.
     Радуйся, с сугубою славою, по исповедании своем, в землю свою возвративыйся;
     Pадуйся, во всем житии верным вере отцев пребывый.
     Радуйся, от лести иноверия премудре уклонивыйся;
     Pадуйся, лукавство проповедников лжеверия яве обличивый.
     Радуйся, твердый защитник правоверия явивыйся;
     Pадуйся, лжесловесие врагов Православия словом здравым препобедивый.
     Радуйся, святый благоверный великий княже Александре.

Кондак 9
     Всего себе повинув Богови, яко раб благий и верный послужил еси Ему, блаженне Александре, паче сверстник твоих для земли твоея потрудився; темже и внити сподобился еси в радость Господа своего, Емуже предстоиши ныне, со Ангелы поя: Аллилуия.

Икос 9
     Витийствующий язык не возмогл бы восхвалити дела твоя, блаженне Александре, яже совершил еси, полагая по братии душу свою; смиренно убо поминающе сицевая исправления твоя, умиленную песнь приносим ти, глаголюще:
     Радуйся, братолюбия христианскаго приискренний ревнителю;
     Pадуйся, Моисеовы и Павловы любве ко братии подражателю.
     Радуйся, заповедей Христовых яже о любви верный исполнителю;
     Pадуйся, и всех нас в любви к присным дивный наставниче.
     Радуйся, примером своим паче слова явивыйся стязающихся о наследии братий своих примиритель;
     Pадуйся, о благе народа усердно в житии своем пекийся.
     Радуйся, общаго мира во днех своих устроителю;
     Pадуйся, изгнаннаго страхом нашествий татарских народа своего собирателю.
     Радуйся, безпомощных присный защитителю;
     Pадуйся, нищих и алчущих питателю.
     Радуйся, сирых сильный покровителю;
     Pадуйся, и ныне всех скорбящих и нуждающихся мощный пред Господем предстателю.
     Радуйся, святый благоверный великий княже Александре.

Кондак 10
     Спасти хотя душу свою, ведый же, яко не имущему любве к Богу никиими же подвиги и добродетельми улучити спасение возможно есть, стяжал еси венец добродетелей, еже есть любовь к Богу, Емуже предстоя ныне, радостно вопиеши: Аллилуия.

Икос 10
     Царя Небеснаго возлюбив от всего сердца твоего, и от всея души твоея, и всею мыслию твоею, принесл еси Ему, блаженне Александре, последи многоразличных приношений веры и усердия, себе самаго в жертву живу, святу, благоугодну; темже ублажающе тя, вопием ти:
     Радуйся, в житии своем всеми богоугодными делы Господеви послуживый;
     Pадуйся, обетами иночества святое житие свое увенчавый.
     Радуйся, многи храмы Божии, безбожными раззоренныя, обновивый;
     Pадуйся, к просиянию подвигов постничества обители святыя созидавый.
     Радуйся, подвизающихся измлада в благочестии ради Бога возлюбивый;
     Pадуйся, ангельский образ и себе чистою душею предызбравый.
     Радуйся, в конец жития своего всего себе Богу посвятивый;
     Pадуйся, приятием схимы, с новым именем Алексия, всесовершенне себе Богу предавый.
     Радуйся, обетом девства чистоту сердца своего явивый;
     Pадуйся, обетом нестяжания высоту духа своего показавый.
     Радуйся, обетом послушания всецелое служение свое Единому Богу во веки утвердивый;
     Pадуйся, к венцу мудраго и благаго князя мзду инока притяжавый.
     Радуйся, святый благоверный великий княже Александре.

Кондак 11
     Пение погребальное слезами растворяшеся у гроба твоего, блаженне Александре; людие твои плакахуся о тебе, солнце земли Русския, в полудни зашедшем, и рыдания прерываху умиленную песнь их к Богу: Аллилуия.

Икос 11
     Свет славы небесныя осия тя вскоре, блаженне Александре, утешая плачущия люди твоя; темже видяще при гробе твоем знамения и чудеса, сынове российстии достойне призываху тя, яко в молитвах предстателя. Мы же, поминающе скорое заступление твое, вопием ти:
     Радуйся, угодниче Божий, в самом погребении прославление от Бога получивый;
     Pадуйся, скорый предстателю наш, егоже призываху отцы наши в нуждах и озлоблениих.
     Радуйся, в борьбе с татары князю Димитрию Донскому явивый вспоможение;
     Pадуйся, царю Иоанну на казанцы одоление исходатаивый.
     Радуйся, исцеления многоразличная всем подаваяй;
     Pадуйся, слепым зрение молитвою твоею возвращаяй.
     Радуйся, хромым, припадающим ко гробу твоему, хождение даруяй;
     Pадуйся, разслабленных неможение врачуяй.
     Радуйся, одержимым от бесов свобождение подаваяй;
     Pадуйся, безнадежных надеждою спасения оживляяй.
     Радуйся, в погубльших разум разумение возставляяй;
     Pадуйся, от гроба твоего многообразная чудотворения присно источаяй.
     Радуйся, святый благоверный великий княже Александре.

Кондак 12
     Благодать познавше, живущую в нетленных мощех твоих, людие владимирстии с любовию прихождаху ко святей раце твоей и, радостно лобызающе ю, славляху о тебе Бога, прославляющаго святыя Своя, со умилением вопиюще Ему: Аллилуия.

Икос 12
     Поюще добродетели и чудеса твоя, радостию сретаху и провождаху отцы наши святое тело твое, егда преселяхуся святыя мощи твоя на новое место покоища в славном святаго Петра граде; и мы ныне, радующеся о небесней славе твоей и обитании нетленных мощей твоих в богоизбранном граде сем, со онеми вопием ти:
     Радуйся, российский Иосифе, на новое место упокоения преселивыйся;
     Pадуйся, всех концев земли Российския покровителю.
     Радуйся, Петрова града благонадежное утверждение;
     Pадуйся, тогоже во бранех небесный защитителю.
     Радуйся, северныя столицы неоцененное украшение;
     Pадуйся, тезоименитыя тебе обители славо и утверждение.
     Радуйся, народу русскому здравие же и спасение молитвами твоими подаваяй;
     Pадуйся, всех упование на тя возложивших богомудрый учителю.
     Радуйся, иноком, яко инок, полезное примером жизни своея наставление преподаваяй;
     Pадуйся, мирским людем, яко в мире потрудивыйся, к добродетелем общежития руководителю.
     Радуйся, нетлением своим всем нам надежду воскресения подаваяй;
     Pадуйся, всех нас в напастех и скорбех поборниче, хранителю и свободителю.
     Радуйся, святый благоверный великий княже Александре.

Кондак 13
     О святый благоверный великий княже Александре! От благоговейных сердец приносимую ти, аще и недостойную, хвалебную песнь сию приими от нас, яко усердную жертву сердец, любящих тя и ублажающих святую память твою. Охраняй всех нас молитвами твоими; огради ходатайствы твоими град твой и вся люди земли Российския, да тихое и безмолвное житие поживше в нынешнем веце, блаженство вечное наследим и купно с тобою и всеми святыми выну сподобимся воспевати Богу: Аллилуия.
Этот кондак читается трижды, затем 1-й икос «Со Ангелы и всеми святыми ...» 1-й кондак «Избранному воеводе...».

МОЛИТВА СВЯТОМУ БЛАГОВЕРНОМУ ВЕЛИКОМУ КНЯЗЮ АЛЕКСАНДРУ
     Скорый помощниче всех усердно к тебе прибегающих и теплый наш пред Господем предстателю, святый благоверный великий княже Александре! Призри милостивно на ны, недостойныя, многими беззаконии непотребны себе сотворшия, к раце мощей твоих ныне притекающия и из глубины сердца к тебе взывающия: ты в житии своем ревнитель и защитник православныя веры был еси, и нас в ней теплыми твоими к Богу молитвами непоколебимы утверди. Ты великое возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив полки супостатов, от пределов российских оных отгнал еси, и на нас ополчающихся всех видимых и невидимых врагов низложи. Ты, оставив тленный венец царства земнаго, избрал еси безмолвное житие, и ныне праведно венцем нетленным увенчанный на Небесех царствуеши, исходатайствуй и нам, смиренно молим тя, житие тихое и безмятежное и к вечному Царствию шествие неуклонное твоим предстательством устрой нам. Предстоя же со всеми святыми Престолу Божию, молися о всех православных христианех, да сохранит их Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога, в Троице Святей славимаго, Отца и Сына и Святаго Духа, ныне и присно и во веки веков. Аминь.

Молитва иная
     О святый благоверный княже Александре! Призри милостивно на ны, недостойныя рабы Божии (имена), и исходатайствуй нам житие тихое и безмятежное, и к вечному Царствию шествие неуклонное твоим предстательством устрой нам, да сохранит нас Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога в Троице Святей славимаго, Отца и Сына и Святаго Духа, ныне и присно, и во веки веков. Аминь.

Тропарь святому благоверному князю Александру Невскому
Тропарь, глас 4:
     Яко благочестиваго корене пречестная отрасль был еси, блаженне Александре, яви бо тя Христос яко некое Божественное сокровище Российстей земли, новаго чудотворца преславна и Богоприятна. И днесь сошедшеся в память твою верою и любовию, во псалмех и пениих радующеся славим Господа, давшаго тебе благодать исцелений. Егоже моли спасти град сей, и стране нашей Богоугодней быти, и сыновом Российским спастися.

Тропарь, глас 4 (Перенесение мощей):
     Познай свою братию, российский Иосифе, не в Египте, но на Небеси царствующий, благоверный княже Александре, и приими моления их, умножая жита людем плодоносием земли твоея, грады владычествия твоего ограждая молением и православным христианом на сопротивныя споборствуя.

Кондак, глас 4:
     Якоже сродницы твои, Борис и Глеб, явишася тебе с небесе в помощь, подвизающемуся на Вейлгера Свейскаго и воев его, тако и ты ныне, блаженне Александре, прииди в помощь твоим сродником и побори борющия ны.

Величание
     Ублажаем тя, святый благоверный княже Александре, и чтим святую память твою, ты бо молиши за нас Христа Бога нашего.

Кондак, глас 8 (Успению):
     Яко звезду тя пресветлую почитаем, от востока возсиявшую, и на запад пришедшую, всю бо страну сию чудесы и добротою обогащаеши, и просвещаеши верою чтущия память твою, Александре блаженне. Сего ради днесь празднуем твое успение, людие твои сущии, моли спасти Отечество твое, и вся притекающия к раце мощей твоих, и верно вопиющия ти: радуйся, граду нашему утверждение.

Величание (на успение великого князя Александра Невского)
     Величаем тя, благоверный княже Александре, и чтим святое успение твое, и ныне молиши за нас Христа, Бога нашего.

 

Комментариев нет: